Як распавяла карэспандэнту Медиа-Полесья дырэктар Столінскага раённага метадычнага цэнтра Алена Дубойская, пераможцаў раённага конкурсу вызначылі амаль з двухсот творчых нумароў, якія прадставілі на суд журы ўдзельнікі з усяго раёна.

Канцэрт, у якім ушаноўвалі пераможцаў, складаўся з 20-ці эстрадных нумароў.

У ролі вядучых выступілі ўдзельнікі клуба аматараў гульні і тэатра пры Рэчыцкім ГДК Дзмітрый Піліпчук і Ганна Ражко.

Спецыяльны прыз для аднаго з пераможцаў конкурсу ў гэтым годзе падрыхтавала і Медиа-Полесье. Яго атрымала вучаніца Альшанскай дзіцячай музычнай школы мастацтваў Марына Лемяза.

Марыне 16 год, сем з якіх яна займаецца ў дзіцячай музычнай школе мастацтваў (фартэпіяна). Як прызналася дзяўчына ў размове з карэспандэнтам Медиа-Полесья, стаць фіналісткай конкурсу “Зоркі Палесся” для яе вельмі значна. А пра тое, каб атрымаць узнагароду яшчэ і ад Медиа-Полесья, яна нават і не думала. Марына выказала словы падзякі за прыз ад нашага сайта.

У музычную школу Марына Лемяза пайшла вучыцца, бо з дзяцінства гэта было яе марай.

 – Я люблю музыку, люблю спяваць, – расказвае Марына. – У маёй вучобе мяне падтрымліваюць бацькі. Тата і мама ў дзяцінстве таксама вучыліся ў музычнай школе, але пакінулі навучанне там. Вось і атрымліваецца, што я, здзяйсняючы сваю мару, здзяйсняю і іх мару таксама.

Сёлета дзяўчына – выпускніца дзіцячай музычнай школы мастацтваў. На выпускным балі яна хоча выканаць песню з рэпертуара гурту NAVIBAND «Гісторыя майго жыцця», якая прагучала на конкурсе песні «Еўрабачанне 2017».

Віншуем Марыну і ўдзельнікаў конкурсу.

Тут можна паглядзець моманты конкурсу “Зоркі Палесся” з 2016 года, з 2015 года, з 2014 года, з 2013 года.