Пётр Астапчук – «Ганаровы паляшук»

Пётр Астапчук – нязменны кіраўнік заслужанага народнага аматарскага ансамбля Столінскага гарадскога Дома культуры.

Ансамбль народнай музыкі «Выцінанка» створаны пры Столінскім гарадскім Доме культуры ў 1981 годзе. Першапачаткова гэта быў невялікі калектыў, які працаваў пры народнай агітбрыгадзе «Вестуны» і народным ансамблі танца «Рэха».  З цягам часу склад ансамбля павялічваўся. За творчыя дасягненні, высокае выканаўчае майстэрства, актыўную канцэртна-гастрольную дзейнасць, уклад у развіццё і папулярызацыю нацыянальнага мастацтва ансамблю ў 1992 годзе прысвоена званне «народны», а ў 2004 годзе – «Заслужаны аматарскі калектыў Рэспублікі Беларусь». У 2009 і ў 2013 гадах ансамбль пацвердзіў званне «Заслужаны».

Рэпертуар ансамбля будуецца на аснове мясцовага фальклору, выконвае ансамбль і эстрадна-папулярную музыку. Кіраўнік ансамбля Пётр Астапчук з’яўляецца аўтарам песень на словы мясцовых паэтаў Ірыны Ляшкевіч «Выразала ночка выцінанку» і Ларысы Вырко «Мелодыя зямлі».

Ансамбль «Выцінанка» удзельнічае ў канцэртах, масавых мерапрыемствах, якія праводзяцца ў горадзе і раёне. Неаднаразова даводзілася музыкантам прадстаўляць Століншчыну на абласных, рэспубліканскіх і міжнародных фестывалях, аглядах і конкурсах. Вясной 2015 года ансамбль «Выцінанка» прадстаўляў Беларусь на Сусветнай выставе «Мілан – Экспа 2015» у г.Мілане (Італія).

Ансамбль «Выцінанка»  і яго кіраўнік плённа працуюць не адзін дзясятак год. І толькі плённая праца дае такія вынікі, якіх  калектыў ужо дасягнуў у папулярызацыі культуры нашага краю. Званне «Ганаровы паляшук» для Пятра Астапчука – яшчэ адно прызнанне творчай дзейнасці не толькі яго, але і ўсяго ансамбля.

Разам з ім узнагароду атрымаў алімпійскі чэмпіён, сяміразовы чэмпіён свету, заслужаны майстар спорту Раман Петрушэнка з Калінкавіч.

Званне «Ганаровы паляшук» прысвойваецца людзям, якія ўнеслі вялікі ўклад у сацыяльна-эканамічнае развіццё Беларускага Палесся, а таксама захаванне і папулярызацыю этнакультурных традыцый гэтага рэгіёна. «Ганаровымi палешукамi» названы каля 10 чалавек, сярод іх і  народны майстар Беларусі са Століншчыны Іван Супрунчык, і старшыня СВК «Фядорскі» Рыгор Дзямко. «Ганаровымі палешукамі» з’яўлеюцца Прэзідэнт Беларусі Аляксандр Лукашэнка, генеральны дырэктар нацыянальнага парка «Прыпяцкі» Сцяпан Бамбіза, мастацкі кіраўнік Нацыянальнага акадэмічнага аркестра сімфанічнай і эстраднай музыкі Беларусі Міхаіл Фінберг.