Успаміны ад мерапрыемства захаваюцца ў памяці яго ўдзельнікаў на доўгія гады.
У межах Міжнароднага пленэра ганчароў у Гарадной адбыўся традыцыйны Гараднянскі кірмаш, на якім майстры прадставілі калекцыі сваіх работ.
Жадаючыя маглі наведаць Цэнтр ганчарства, дзе размешчаны працы ўдзельнікаў мінулых пленэраў, а таксама работы мясцовых ганчароў.
СПРАВКА “МП”
Міжнародныя пленэры ганчароў у вёсцы Гарадная праходзяць з 2008 года. Раз у два гады збіраюцца тут майстры не толькі з Беларусі, але і з іншых краін свету. У чатырох пленэрах удзельнічалі ўжо ганчары з 12 краін свету. Цэнтр ганчарства вёскі Гарадная быў створаны ў 2003 годзе з мэтай захавання і папулярызацыі лепшых традыцый народнага ганчарнага промыслу.
Марыя і Таццяна Каленкіны ў Гарадную прыехалі з расійскага Арла. У гарадной маці і дачка ўпершыню:
– Впервые здесь. О пленере узнали во время фестиваля в Скопине, на котором были представители из Бреста. Они рассказали нам о таком местечке и пригласили сюда на пленер. Всё здесь запомнилось. Важно, что гончарство здесь продолжается, что живёт. Дома будем всем рассказывать, что, оказывается, в Беларуси есть такие места, где продолжает развитие гончарный промысел, что до сих пор люди здесь занимаются гончарством. А глина здесь какая! Сама она чего только стоит! У нас лёгкоплавная, а здесь тугоплавная. Работать с такой глиной одно удовольствие. Понравились ваши Ольманские болота, агроусадьбы. В восторге от всего увиденного на Брестчине.
Удзельнікаў пленэра, мясцовых майстроў і жыхароў Гарадной ушаноўвалі падчас святочнай канцэртнай праграмы. Ва ўрачыстым шэсці прайшлі ганчары ў суправаджэнні творчых калектываў Століншчыны, Піншчыны і Лунінеччыны да сцэнічнай пляцоўкі. Старшыня Столінскага райсавета дэпутатаў Аляксей Дзямко і начальнік галоўнага ўпраўлення ідэалагічнай работы і па справах моладзі Брэсцкага аблвыканкама Аляксандр Мурашкін узнагародзілі ўдзельнікаў і арганізатараў пленэра.
Аляксандр Мурашкін адзначыў, што, магчыма, праз тысячу гадоў нехта з нашчадкаў выкажа словы падзякі за тое, што мы зараз сваімі рукамі захоўваем спадчыну, што гэта традыцыя будзе жыць дзякуючы тым паслядоўнікам ганчарства, якія любяць гліну, любяць працу.
Удзячныя ганчары падарылі цэнтру ганчарства вёскі Гарадная паднос са сваімі аўтографамі.
Ушанавалі на свяце доўгажыхара вёскі – 99-гадовую Марыю Сцяпанаўну Мікша і самага маленькага жыхара вёскі Дар’ю Аўчыннікаву.
А бацька дзяўчынкі Аляксандр Аўчыннікаў – мясцовы ганчар і ўдзельнік пленэра. У Гарадной шмат мнагадзетных сем’яў, сярод якіх сям’я Андрэя і Іны Ільічэўскіх. Сям’я Сяргея і Марыі Гмір узнагароджана за самы добраўпаракаваны падворак.
За шматгадовую і добрасумленную працу падарункі атрымалі загадчыца вясковай аптэкі Ніна Гмір і трактарыст Мікалай Шэлест.
У зале мясцовага Дома культуры працавала выстава работ удзельнікаў пленэра і быў наладжаны прагляд краязнаўчых кінастужак пра Гарадную.
Разам з вырабамі ўдзельнікаў пленэра свае работы прадставілі народныя майстры з розных куточкаў Брэстчыны.
– У Гарадной упершыню. Каб прыехаць сюды на кірмаш, давялося выязджаць у пяць гадзін ранку, – расказвае Аляксандр Пракапчук, які прадстаўляе творчасць майстроў Бярозаўскага раённага цэнтра рамёстваў. – Стомленасці няма. Цікава тут вельмі.
Набыць гліняны посуд, свістулькі для дзяцей, медальёны і іншыя рэчы можна было кожнаму.
У гэтым годзе ў пленэры ганчароў у Гарадной прынялі ўдзел 30 майстроў керамікі з Арменіі, Беларусі, Літвы, Польшчы, Расіі і Украіны.
Праз два гады Гарадная зноў прыме Міжнародны пленэр ганчароў.
