Цэнтр ганчарства ў вёсцы Гарадная, што на Століншчыне, адзначае сваё 10-годдзе

З гэтай нагоды 9 красавіка плануецца прыезд у вёску Гарадная вядомых на Беларусі ганчароў: Васіля Логвінава і Валерыя Марчука (г.Брэст), Сяргея Моўчана (г.Мінск), Віталя Шэпелевіча (г.Ганцавічы), Паўла Вялічка (г.Бабруйск). На працягу трох дзён майстры будуць глазурыраваць гліняныя вырабы, зробленыя ў час ІІІ Міжнароднага пленэра ганчароў, што прайшоў летам 2012 года ў Гарадной.

«Адметна, што Цэнтр ганчарства захаваўся да гэтага часу, – адзначыла загадчыца аддзела традыцыйнай культуры ДзУК «Брэсцкі абласны грамадска-культурны цэнтр» Ларыса Мікалаеўна Быцко. – Ганчарная праца – гэта вельмі цяжкая праца, на жаль, не цікавая для сучаснай моладзі. Але тым не менш, Цэнтрам ганчарства вядзецца работа па прыцягненню маладога пакаленя да авалодання гэтым уменнем продкаў».

Акрамя таго, 11 красавіка ў Гарадной плануецца правядзенне юбілейнай вечарыны. «Рыхтуем фотаздымкі, якія распавядаюць гісторыю ганчарнай справы ў вёсцы, выставу гліняных вырабаў, музычныя віншаванні ад узорнага аматарскага аб’яднання прыхільнікаў фальклору  «Згадка» і многае іншае», – раскрыла некаторыя таямніцы юбілейнага мерапрыемства дырэктар раённага метадычнага цэнтра Алена Мікалаеўна Дубойская.

«Мы вельмі хвалюемся, рыхтуемся і з нецярпеннем чакаем гасцей на юбілей», – дадала дырэктар Цэнтра ганчарства Алімпіяда Дзмітрыеўна Леанавец.