Вяртаюцца птушкі з выраю: на Лунінеччыне зафіксаваны прылёт белых буслоў і шпакоў

Пра гэта карэспандэнту "Медиа-Полесья" распавёў сябра грамадскай арганізацыі “Ахова птушак бацькаўшчыны” Анатоль Нефідовіч.

“Анамальна халоднае надвор’е ўнесла карэктывы не толькі ў жыццё людзей, але і ў жыццё птушак, – падкрэсліў Анатоль Нефідовіч. – Усе без выключэння птушкі пакутуюць ад холада і бязкорміцы. Асабліва цяжка пры такім надвор’і здабываць ежу драпежнікам, кормам якіх з’яўляюцца мышы – перашкаджае глыбокае і шчыльнае снегавое покрыва. Так, у ваколіцах Лахаўкі на днях знайшлі загінуўшую вушастую саву”.

Ужо некалькі гадоў Беларусь сустракае птушак правядзеннем усееўрапейскай кампаніі “Жывая вясна”. Арганізаваная для дзяцей і падлеткаў адукацыйная акцыя накіраваная на назіранне за пералётамі птушак і развіццё цікавасці насельніцтва да прыроды і, у прыватнасці, да птушак.

Мапу вясны можна праглядзець на сайце www.springalive.net, і кожны можа прыняць удзел у гэтай кампаніі, дадаўшы свае назіранні  за першай сустрэчай у гэтым годзе з белым буслом, вясковай ластаўкай, зязюляй, свіргулём і шчуркай-пчалаедкай.

Па інфармацыі АПБ, у Беларусі зарэгістравана каля 200 відаў пералётных птушак.