“Верагоднасць цуду” – новая кніга Міколы Ільючыка

“ Верагоднасць цуду” – кніга доўгачаканая, – адзначыў Мікола ў сваім выступе, – два гады праляжала ў выдавецтве “Мастацкая літаратура”, а потым вырашыў перадаць  яе ў Брэсцкую друкарню”.

Аўтар таксама распавёў, што з фінансаваннем дапаглі сябры. Але, на жаль, прыйшлося адмовіцца ад каляровых іллюстрацый.

У прадмове зборніка гаворыцца: “У сваёй творчасці аўтар імкнецца ісці ад жыцця, якое, вядома ж, бывае розным – і драматычным, і трагічным, і рамантычным, а нярэдка і анекдатычным… Такія і творы, што склалі кнігу, – яны прымушаюць чытача і пасміхацца, і задумацца, і прыслухацца да сваіх пачуццяў, да голаса сэрца… “

У кнігу ўвайшлі творы, напісаныя аўтарам з 2006 па 2012 год. Рэдагавала выданне наша зямлячка Аксана Спрынчан.

Асноўная працоўная біяграфія Міколы прайшла ў Лунінецкім райаддзеле па надзвычайных сітуацыях. Алё ўсё яго жыццё звязанае з творчасцю.

Ужо пабачылі свет такія зборнікі твораў Міколы Ільючыка, як “Ці жыве душа”, “Шматкроп’е кропель”, “Роспач і надзея”, аповесць “У памяти в долгу». Ён таксама аўтар дзіцячай кнігі “Цуд на Каляды”. Друкаваўся ў шэрагу калектыўных зборнікаў.

Павіншаваць калегу прыйшлі сябры БАЖ і Саюза беларускіх пісьменнікаў, літаратары і прыхільнікі яго творчасці.

-Ужо думаю пра выданне новай кнігі прозы, – прызнаўся Мікола . Пажадаем яму здзейснення планаў, паболей цудаў, а чытачам – і надалей атрымліваць асалоду ад твораў нашага таленавітага земляка.