На пляцоўцы ля Дварэцкага СДК працавалі выставы “Лунінецкія клубніцы” і “Шчадроты Палесскага краю”. Народныя майстры і мастакі прадставілі свае творчыя знаходкі, звязаныя з брэндам Лунінеччыны – клубніцамі: малюнкі, рушнікі, цацкі, іншыя арыгінальныя і цікавыя рэчы.

Для малых удзельнікаў свята функцыянавала дзіцячая пляцоўка. Ладзіліся спартыўныя мерапрыемствы, працаваў гандаль.

Узнагароды за развіццё брэнда Лунінеччыны ўручыла загадчыца аддзела культуры Лунінецкага райвыканкама Ганна Баецкая, якая выказала спадзяванні, што з цягам часу маладое свята ператворыцца ў сапраўдны фестываль.

У канцэртнай праграме прынялі ўдзел запрошаныя госці: фальклорна-этнаграфічны калектыў “Крыніцы” з Піншчыны і “Церабяжоўскія харашухі” са Століншчыны. Выступілі таксама і мясцовыя “Вандроўнікі”,  народны ансамбль “Сустрэча”з Кажан-Гарадка. Абрад “Ваджэнне кусты” правялі прадстаўнікі Дзятлавіцкага СДК. Вакальнымі нумарамі парадавалі прысутных і іншыя артысты Лунінеччыны.