Што тычыцца індэкса свабоды СМІ, то, як вядома, па мінулагодніх дадзеных Беларусь займае ў ім 168-е месца. На распрацаванай арганізацыяй карце, на якой пры дапамозе розных колераў адлюстравана сітуацыя са свабодай СМІ, Беларусь – чорная. Такога ж колеру Іран, Судан, Куба, Паўночная Карэя, Кітай і яшчэ некалькі краін Азіі і Афрыкі, а з былога СССР – Узбекістан, Туркменістан, Азербайджан.
Як распавяла журналістам рэферэнт па пытаннях прэсы Ульрыке Груска, Беларусь “абвалілася” на самыя нізкія месцы ў рэйтынгу пасля снежня 2010 года. “Калі журналістаў б’юць, садзяць у турмы – гэта вельмі пагаршае пазіцыю краіны, – падкрэсліла рэферэнт па пытаннях прэсы. – У Беларусі няма свабоднага тэлебачання, незалежным СМІ складана атрымаць інфармацыю, а онлайн-сайты іншым часам знаходзяцця пад атакамі”, – заўважыла яна.
“Рапарцёры без межаў” таксама складаюць спіс ворагаў прэсы, робяць класіфікацыю ворагаў Інэрнэта (фіксуюць, у якіх краінах абмяжоўваўся доступ да тых ці іншых сайтаў). Адзін з накірункаў працы – дапамога журналістам ва ўсім свеце, якія пацярпелі ад рэжыму.
