Беларускае добраахвотнае таварыства аховы помнікаў гісторыі і культуры ў межах агульнанацыянальнай кампаніі «Будзьма беларусамі» падрыхтавала прапановы па наданню статусу гісторыка-культурнай каштоўнасці мясцінам, звязаным з паўстаннем 1863 г. У сувязі з гэтым Беларускай навукова-метадычнай радай пры Міністэрстве культуры былі ўнесены для разгляду ў Савет міністраў прапановы аб магчымасці надання статусу гісторыка-культурных каштоўнасцей шэрагу помнікам.

У в.Калоднае на месцы баёў паўстанцаў з царскім атрадам у 1863 годзе пастаўлены невялікі абеліск і ўстаноўлены крыж. Таму стараста вёскі і краязнаўца Міхаіл Міхайлавіч Карсека накіраваў у Столінскі райвыканкам  просьбу аб магчымасці надання гэтаму месцу гісторыка-культурнай каштоўнасці, у якой прывёў факты, што пацвярджаюцца матэрыяламі, выкладзенымі ў кнігах А.Т.Федарука «Старинные усадьбы Берестейщины», Л.М.Несцерчука «Замкі, палацы Берасцейшчыны Х-ХХ стагоддзяў» .

«З аддзела культуры атрымаў адказ, што пытанне аб наданні статуса гісторыка-культурнай каштоўнасці памятным месцам будзе разгледжана на бліжэйшым пасяджэнні каардынацыйнага савета па захаванню гісторыка-культурнай спадчыны раёна, – расказаў Міхаіл Карсека. – А 31 кастрычніка прыйшоў ліст за подпісам старшыні райвыканкама, што разгляд майго звароту прадоўжаны да 21 снежня».

Дарэчы, з нагоды 150-годдзя з моманту паўстання 1863 г. статус помнікаў гісторыі мясцовага значэння ўжо набылі магілы паўстанцаў у Косаве і Плябані, а мемарыялу на месцы бітвы пад Мілавідамі нададзены статус помніка гісторыі нацыянальнага значэння.