Старт святочнай кампаніі быў дадзены ў мястэчку Лагішын, што ў 30 кіламетрах ад Пінска. Жыхарам была прадстаўлена канцэртная праграма “Ганаруся табою, Беларусь сінявокая”.

Усё пачалося з ускладання вянкоў да брацкай магілы і шэсця святочнай калоны да мясцовага стадыёну. Перад прысутнымі з прамовай выступіў старшыня Пінскага раённага выканаўчага камітэту Валерый Рыбкавец, які, дарэчы, родам з Лагішына. Святочны дзень завяршаў канцэрт спалучаны з акцыяй “Праспяваем гімн разам” і феерверк.

2 ліпеня “святочны фронт” дасягнуў сталіцы Палесся. На вечар запланаваны канцэрт беларускай спявачкі Ірыны Дарафеевай "Полёт над Ойкуменой", у якім, між іншым, удзельнічаюць артысты Дзмітрый Пенкрат, Яўген Слуцкі (пераможца конкурсу “Акадэмія талентаў”), Алена Бярэзіна і група "Форс-минор". Артысты выступяць на сцэне ГДК, што на плошчы Леніна.

Кульмінацыя святкавання Дня Незалежнасці будзе, як і па ўсёй краіне, 3 ліпеня. Гэты дзень па праграме выглядае традыцыйным і мала чым адрозніваецца ад іншых гарадоў. Усё залежыць ад таго, колькі ў горадзе “рытуальных месцаў” для паклону.

У Пінску а 10-й гадзіне пачнецца ўскладанне кветак ля помніка партызанам, што на вуліцы Першамайскай (каля маленькага рынка). Пасля ўрачыстасці перамесцяцца ў цэнтр. І ўжо ў 11 гадзін чакаецца мітынг з ускладаннем кветак да магілы ваяроў-вызваліцеляў у гарадскім парку культуры і адпачынку. На гэта адведзена 30 хвілін. Далей пачнуцца “ўлюблёныя грамадству” народныя гулянні.

Гараджане, якія зацікаўленыя не толькі ў забавах, могуць прайсці майстар-класы па розных накірунках прафесійнай дзейнасці, альбо азнаёміцца з выставамі творчасці народных майстроў.

Арганізатары абяцаюць прадставіць парад мадэляў і ярмарку прафесій адмыслова для абітурыентаў і іх бацькоў.

Мерапрыемствы традыцыйна будуць адбывацца ў гістарычным цэнтры: вуліца Леніна, пляцоўка каля Дома культуры і гарадскі парк культуры і адпачынку.