Пераклад тэкста на беларускую мову зрабіў паэт Андрэй Хадановіч. Стварэннем роліка займаўся праект «Спяваем годна», перадае «Радыё Свабода».

Песня «Перемен», створаная музыкам Віктарам Цоем 35 гадоў таму, стала сапраўдным гімнам шмат у якіх краінах на постсавецкай прасторы.

У запісе ўдзельнічалі Станіслаў Мытнік (Akute), Алесь Лютыч (:B:N:), Павел Гарадніцкі (RSP), Дзмітрый Шампанаў (Inomarki), гурты MTM, Katevan, музыкі і выканаўцы Мікіта Мяцельскі, Сяргей Башлыкевіч, Вадзім Раманаў, Марыя Лысенка, Паліна Дабравольская, Павел Лубчонак, Вольга Франка ды іншыя.

Музычны праект «Спяваем годна» запусцілі грамадская кампанія «Годна» разам з лідэрам гурту Vuraj і стваральнікам «Спеўнага сходу» Сяргеем Доўгушавым. Раней былі выкананыя «Паветраны шар» разам з Лявонам Вольскім, «Я нарадзіўся тут» са Змітром Вайцюшкевічам, гімн «Пагоня» і народная песня «Што й па мору».

Сэнс ініцыятывы ў тым, каб збіраць беларусаў з розных куткоў свету ў інтэрнэце і спяваць вядомыя і знакавыя беларускія песні разам з іх аўтарамі і выканаўцамі. Прыняць удзел у запісе можа любы, для гэтага трэба далучыцца да тэлеграм-каналу «Годна». Там будуць публікавацца анонсы, а таксама парады, як правільна спяваць і граць, каб звесці відэа і гук.