24 ліпеня прайшла сустрэча з мясцовым ганчаром Рыгорам Кавалька, які расказаў пра справу свайго жыцця. Бацька ганчара загінуў пасля вайны (падарваўся на міне ва ўласным агародзе), Рыгор гадаваўся без яго. Хлапчуком зацікавіўся справай аднавяскоўцаў і ўсё сваё свядомае жыццё стварае вырабы з гліны: збаны, гаршчкі, міскі і г.д.

Акрамя сустрэчы з ганчаром, удзельнікі пленэра вядуць практычныя работы за ганчарным колам. Яны пабывалі ў ваколіцы вёскі, дзе вядзецца нарыхтоўка гліны для будучых ганчарных вырабаў.

Дырэктар Цэнтра ганчарства в.Гарадная Алімпіяда Леанавец кажа, што работы тут хопіць усім ганчарам. А тым, хто жадае ўбачыць працу беларускіх і замежных майстроў сваімі вачыма, раіць паспяшацца ў Гарадную.

Адным з яркіх дзён пленэра стане нядзеля, 27 ліпеня. У гэты дзень адбудзецца свята “Гараднянскі кірмаш” з правядзеннем майстар-класаў, даставаннем посуду з горну. Тут жа, пры жаданні, можна будзе і набыць ганчарныя вырабы. Выступяць на гараднянскай сцэне калектывы мастацкай самадзейнасці раёна. З праграмай пленера можна пазнаёміцца тут.

Міжнародны пленэр ганчароў праходзіць раз у два гады на Століншчыне з 2003 года.