У мясцовым Доме культуры сабраліся жыхары вёскі, творчыя калектывы, супрацоўнікі культуры. Зала нагадвала беларускую хату з тагачаснымі прыладамі працы, тканымі дыванамі і ручнікамі, ганчарнымі вырабамі. А ў чырвоным куце з іконай і свечкамі праходзілі галоўныя дзеянні мерапрыемства.
Тэатралізаванае прадстаўленне пачолся з таго, як дзве дзяўчыны Алена і Алеся збіраюцца на вячоркі. Яны прыбіраюць хату, ужываючы магічныя прыёмы затрымання хлопцаў на пасядзелках. Адна мяце смецце да чырвонага кутка, а другая кладзе нагавораны палонік у печ. Гаспадар і гаспадыня сумуюць, успамінаючы свае маладыя гады, як некалі ўдзельнічалі ў вячорках…
Песні ў выкананні фальклорных калектываў Лунінскага СДК, Багданаўскага СДК і народнага аматарскага аб’яднання “Жывіца” Вулькаўскага-1 ЦКНТ перанеслі гледачоў у атмасферу таго часу. Аўтэнтычныя спевы пачатку 20-га стагоддзя – гэта не жартачкі: дайшло і да скокаў, і да прыпевак. Не абышлося і без цёткі шаптухі, якая наваражыла маладым дзяўчатам жаніхоў.
Плануецца, што такія мерапрыемствы будуць праходзіць і надалей, прыблізна раз у квартал. Таму, аматары беларускай гісторыі і культуры, далучайцеся!
