З-за падзення коштаў на нафту і іншых неспрыяльных фактараў беларускі бюджэт сёлета страціць каля паўмільярда долараў. Пра гэта ў інтэрв’ю праграме “Галоўны эфір” тэлеканала “Беларусь 1” заявіў увечары 22 сакавіка першы намеснік міністра фінансаў Максім Ермаловіч.
Паводле яго словаў, бюджэт Беларусі разлічваў атрымаць болей за 1,5 мільярда долараў і пры гэтым туды закладваўся кошт на нафту ў 83 долара за барэль. Але ж цяпер прагнозны кошт нафты ацэньваецца ў 50-55 долараў, таму чаканыя прыбыткі бюджэту складуць толькі мільярд долараў.
Урад разлічвае атрымаць дадатковыя прыбыткі пасля адмены тарыфных і нетарыфных бар’ераў у межах Еўразійскага эканамічнага саюза. Паводле ініцыяванага Мінфінам даследавання, пасля адмены гэтых абмежаванняў у Беларусі на 2,8% прырасце ВУП, дабрабыт грамадзян падвысіцца на 7,3%.
У цяперашняй эканамічнай сітуацыі ўрад не плануе скарачаць выдаткі на сацыяльныя патрэбы, хоць пры гэтым на 5% знізяцца расходы на ўтрыманне бюджэтных арганізацый, перадае БелаПАН.
