Андрэй Ягораў: “Прыходзьце і здавайцеся – гэта не перамоўны працэс”

— Перспектыва перамоў з беларускім рэжымам увогуле цьмяная, калі мы не бяром да ўвагі фактар Украіны. Першымі перамовамі, дзе могуць абмяркоўвацца ўнутрыбеларускія пытанні з нашым удзелам, будуць перамовы па пасляваенным урэгуляванні сітуацыі ў рэгіёне. Там узнімецца і пытанне Беларусі.

І гэтае пытанне можа вырашацца без самой Беларусі, з Беларуссю, прадстаўленай Лукашэнкам, ці з Беларуссю, прадстаўленай Лукашэнкам і намі. Калі гэтыя перамовы пачнуцца заўтра, нас там не будзе. А мы мусім там быць, — кажа абраны спікер абноўленай Каардынацыйнай Рады Андрэй Ягораў.

Ягораў падкрэслівае: калі гаворка ідзе пра перамовы, не трэба ўяўляць сустрэчу абстрактнага функцыянера рэжыму Лукашэнкі і прадстаўніка дэмсілаў. І прапанова беларускіх уладаў “прыехаць і пакаяцца” не мае нічога агульнага з перамовамі, дадае ён. Але як павінен выглядаць, на яго погляд, гэты перамоўны працэс?

— Я б адштурхоўваўся ад таго, што казаў Алесь Бяляцкі. Мы мусім скончыць грамадзянскую вайну ў краіне. Мы мусім рухацца да нацыянальнага прымірэння. У гэтым вялікі маральны пафас з боку Алеся Бяляцкага. І гэтыя словы адрасаваныя не толькі рэжыму, але і нам. А мы знаходзімся ў такім стане, калі на нашым баку, на мой погляд, мала што падрыхтаванае да такіх перамоў.

Давайце вымяраць гэта [нашу падрыхтоўку. — Еўрарадыё] сітуацыяй магчымых перамоў пасля вайны. Ці зможам мы трапіць туды? Ці запросіць нас туды Украіна? Ці будзе настойваць на нашым запрашэнні Захад? Мне падаецца, пакуль не. А чаму “не”? Таму што штосьці не так з самімі намі. Таму мы павінны паставіць задачу — і вырашыць яе.

Да таго ж, вызваленне палітвязняў і палітычныя перамовы з рэжымам для ўрэгулявання палітычнага крызісу — гэта два розныя пытанні, кажа Ягораў.

— Калі мы іх аб’ядноўваем у пакет, шмат што падаецца невыканальным. Ці можа быць выкананае “толькі тады, калі беларускі рэжым саступіць уладу”. Калі мы ўсё перадавяраем рэжыму. А праца па вызваленні палітвязняў мае пад сабою дыпламатычныя высілкі, гуманітарны аспект, якія наўпрост не звязаныя з вырашэннем палітычнага крызісу ў Беларусі.

А ці мае права Каардынацыйная рада праводзіць перамовы? Ягораў нагадаў, што ўласна для гэтага яна і была створаная.

— Каардынацыйная рада атрымала мандат ад Святланы Ціханоўскай на вядзенне такіх перамоў па вырашэнні палітычнага крызісу і ў пэўным сэнсе захоўвае сваю дзейнасць. Але цяпер КР — не адзіны суб’ект, які сёння рэпрезентуе дэмакратычныя сілы. Шмат што змянілася, сама сітуацыя моцна змянілася. У перспектыве перамоўная група будзе фармавацца агульным рашэннем розных структур, тых, якія будуць займаць лідарскія пазіцыі і кантраляваць важныя аспекты жыцця ў самой Беларусі.

Поўную версію размовы глядзіце на Еўрарадыё.

Чтобы следить за важными новостями, подписывайтесь на наш канал в Telegram и группы в социальных сетях: Вконтакте, Одноклассники, Facebook, Instagram.

Уважаемый читатель. Если Вы солидарны с журналистами, считаете этот материал важным, Вы можете поделиться ссылкой со своими друзьями и родными. Так Вы поддержите нашу работу и свободную прессу. Спасибо, что Вы с нами!