Тэма семінара – «Дзіцячы фальклор роднай вёскі». Метадыст па фальклору і этнаграфіі раённага метадычнага цэнтра Ніна Аляксееўна Лісавец распавяла, якія жанры народнай творчасці захаваліся на Століншчыне. Кіраўнік узорнага дзіцячага аб’яднання аматараў фальклору «Згадка» Мачульскага сельскага дома фальклору Ірына Мікалаеўна Ляшкевіч падзялілася з калегамі вопытам работы. «Дзіцячы фальклор – гэта казкі майго дзядулі, маёй бабулі», – адзначыла Ірына Ляшкевіч.
Перад удзельнікамі семінара выступілі юныя зорачкі з малодшай і старэйшай груп калектыву «Згадка»: спявалі, танцавалі, паказалі, як гуляць у народныя гульні. Дарэчы, гэта выступленне – дэбют малодшай групы дзіцячага аб’яднання.
Адбылася прэзентацыя інфармацыйна-метадычнага зборніка «Культурныя здабыткі», што выдаецца метадычным цэнтрам раз у квартал. «Зборнік змяшчае не толькі метадычныя парады кіраўнікам гурткоў дзіцячай творчасці, але і сцэнарныя распрацоўкі для правядзеня мерапрыемстваў», – дадала дырэктар раённага метадычнага цэнтра Алена Мікалаеўна Дубойская.