– Мяне адзываюць са збораў, – паведаміў Віталь Медиа-Полесью. – Гэта значыць, што недзе наверсе зразумелі – задума з маім прызывам не мела сэнсу і нясе толькі шкоду. Таксама гэта значыць, што я застаюся з сям’ёй, замест таго каб ехаць у Бронную Гару на склад ракет.
Нагадаем, учора на нашым сайце быў змешчаны блог Віталя Каратыша, у якім ён выказаў спадзяванне на тое, што знойдуцца разумныя людзі, якія не адправяць яго на зборы насуперак яго волі, бо ён не можа пакінуць у гэты час жонку з немаўлём.

Віталь звязваў сваю адпраўку ў “партызаны” з пачаткам у чэрвені выбарчай кампаніі і давёў да ведама ўладаў, што ўдзельнічаць у ёй не збіраецца.

– Я упэўнены, што маё «вызваленне» стала магчымым толькі дзякуючы падтрымцы СМІ, сяброў, неабыякавых людзей. Часта распаўсюд інфармацыі з’яўлецца апошняй магчымасцю ў барацьбе за справядлівасць.

Віталь падзякаваў сябрам за словы падрымкі і падкэсліў:

– З’яўляецца асцярожны аптымізм наконт таго, што часам улады задумваюцца пра перспектывы, пра меркаванне людзей. Нам яшчэ вельмі далёка да адкрытасці і дэмакратыі, але пачынаць трэба з таго, каб пачуць адзін аднаго.

Каратыш прапануе перастаць шукаць ворагаў, а пачынаць думаць пра тое, як жыць далей. Тое, што яго не ўзялі зараз ў войска, лічыць перамогай здаровага сэнсу над глупствам.

 – Я рады што застаюся з сям’ёй. А жонка радая яшчэ больш, чым я. Нават дачушка весела ўсміхаецца, – кажа суразмоўца.

Між іншым,  Віталь Каратыш падкрэслівае, што не адмаўляецца несці службу ў адпаведнасці з законам:

– Мне сапраўды цікава было б павысіць свой досвед. Таму з задавальненнем прайду зборы ў 2017 годзе альбо ў іншы час, – адзначыў ён.