У гэты дзень у музеі класіка беларускай літаратуры ў Мінску адбудзецца адмысловая імпрэза. Акрамя таго, паэма “Сымон-музыка” прагучыць на шасці мовах у эфіры міжнароднага радыё “Беларусь”. На працягу дня ўрыўкі вядомага твору будуць гучаць па-беларуску,  па-руску, па-ўкраінску, па-казахску, па-англійску і па-іспанску.

Падтрымалі культурніцкую акцыю і ў Пінску. 4 снежня а 16-й гадзіне ў Пінскай гарадской дзіцячай бібліятэцы пройдуць чытанні твора народнага паэта Беларусі. Пад час мерапрыемства любы ахвочы можа прачытаць выбраныя ўрыўкі з “Сымона-музыкі”.

Варта адзначыць, што 4 снежня чытаць паэму “Сымон-музыка” будуці і ў іншых краінах.  Свой удзел у сацыяльна-культурнай акцыі падцвердзілі музеі Расіі, Літвы і Украіны, цэнтральная бібліятэка горада Валгаграда і таварыства беларускай культуры “Спадчына” з літоўскага Друскенікая.

Паэма “Сымон-музыка” уваходзіць у залаты фонд беларускай літаратуры. Яе вывучаюць у школе. Па яе матывах ставяць спектаклі, ладзяць арт-перфомансы. На аснове паэмы напісаны сімфанічная партытура і опернае лібрэта.