Карэспандэнты Медыя-Палесся пастараліся высветліць, хто цяпер ідзе ў бібліятэкі і што зараз прапануюць у гэтых установах чытачам.

У цэнтральнай бібліятэцы Лунінца кажуць, што чытаючых людзей у раёне нямала. У бібліятэку ідуць школьнікі, прыходзяць і студэнты. Аднак самыя пастаянныя наведвальнікі бібліятэкі – пенсіянеры. На Лунінеччыне ў бібліятэкі часцей прыходзяць жанчыны, чым мужчыны.

На Століншчыне значную частку наведвальнікаў бібліятэк складаюць дзеці (як хлопчыкі, так і дзяўчынкі) і падлеткі. За патрэбнай літаратурай прыходзяць студэнты і навучэнцы ліцэя, каледжа. Вельмі шмат сярод чытачоў пенсіянераў і людзей пажылога ўзросту, у пераважнай большасці гэта жанчыны.

Пінчукі любяць пачытаць кніжныя навінкі, аб якіх даведваюцца з інтэрнэта (некаторыя з іх нельга скачаць бясплатна, таму людзі і ідуць у бібліятэку). Моладзь у цэнтральнай гарадской бібліятэцы часта шукае падручнікі, а бабулі бяруць кнігі для сваіх унукаў.