Пра гэта паведаміла дырэктар музея Ніна Рыгораўна Паўлавец, якая выступіла ініцыятарам рэстаўрацыі. Яна паведаміла “Медиа-Полесью”, што ў канцы кастрычніка ўжо будуць першыя наведвальнікі.
Рэстаўрацыя пачалася болей года таму. Будынак ужо даўно патрабаваў рамонту, бо ствараўся на базе старой школы ў канцы 80-х гадоў мінулага стагоддзя.
Стваральнік і першы дырэктар музея Іван Іосіфавіч Калоша (1928-2010) узгадваў, што пры заснаванні выкарыстоўвалася досыць не якасныя будаўнічыя матэрыялы, бо ў Савецкім Саюзе панаваў іх дэфіцыт. Галоўнае тады было зрабіць музей.
“Музей абнавіўся не толькі з пунту гледжання будаўнічага, – распавядае Ніна Паўлавец. – З’явіліся новыя экспанаты, што вельмі радуе. Галоўнае, што цяпер дом будзе мець такі выгляд, якім быў у часы знаходжання ў Пінкавічах Якуба Коласа”.
Будынак, дзе знаходзіцца музей, пабудаваны ў 1864 годзе. Да 1921 года там была школа, ў якой з 1904 па 1906 год працаваў настаўнікам Якуб Колас. З 1921 па 1939 год тут знаходзілася Пінскае лясніцтва. У 1941 г. немцы зноў размясцілі ў будынку школу, якая дзейнічала і пасля вайны да сярэдзіны 80-х гадоў.
