Конкурс “Я – грамадзянін Беларусі” арганізаваны аддзелам бібліятэчнага маркетынгу ЦРБ напярэдадні 70-годдзя вызвалення Беларусі ад нямецка-фашысцкіх захопнікаў. “Мэты, якія мы ставілі перад правядзеннем конкурсу, – садзейнічаць патрыятычнаму выхаванню дзяцей, папулярызацыі беларускай мовы і літаратуры, павышэнню статуса кнігі і чытання сярод падрастаючага пакалення”, – расказвае метадыст аддзела маркетынгу Столінскай ЦРБ Кацярына Страха.

Падчас вясенніх канікул у бібліятэках раёна прайшоў адборачны тур, які завяршыўся выступленнямі на сцэнах Столінскага  ГДК і Альшанскага СДК.

Некаторыя дзеці чыталі вершы ў нацыянальных касцюмах, хтосьці – пад суправаджэнне электроннай прэзентацыі. Для канкурсантаў выступілі: дзіцячы танцавальны гурток Столінскага ГДК,   лялечны гурток “Пралеска” Альшанскай сельскай дзіцячай бібліятэкі, Аліна Гарцуева з музычнай кампазіцыяй.

Па выніках конкурсу першае месца прысуджана Яніне Наскевіч з Аздаміч (7 клас) і Людміле Страха з Рубля (7 клас), другое месца – Дзмітрыю Андрусевічу з Белавушы (6 клас) і пяцікласніцам з Давыд-Гарадка Вераніцы Бесан, Святлане Стаднік і Кацярыне Гудзім. Трэцяе месца прысвоена трэцякласніку з Варанёў Андрэю Велясніцкаму і васьмікласніку з Хорска Юрыю Хімічу.

Прызы глядацкіх сімпатый атрымалі другакласніца Марыя Леўкавец з Мачуля і сямікласніца Алена Лазіцкая з Плотніцы.

 “Такі конкурс мы праводзілі ўпершыню, меркавалі, што гэта ўжо састарэлая форма і яна не будзе цікавай, – гаворыць загадчык аддзела маркетынгу Столінскай ЦРБ Іван Ляшкевіч, – але калі правялі, то ўбачылі, што дзецям спадабалася. Нашы чаканні пераўзыдзены”.

 Усяго ў конкурсе прынялі ўдзел 42 юных чытача ва ўзросце ад 7 да 15 гадоў, якія наведваюць бібліятэкі раёна. Дзеці чыталі не толькі вершы беларускіх паэтаў, але і творы, напісаныя землякамі: настаўніка і паэта з Давыд-Гарадка Віктара Вабішчэвіча, бібліятэкара Вялікамалешаўскай сельскай бібліятэкі Святланы Карняйчук.

Пераможцы і прызёры конкурсу ўзнагароджаны граматамі і падарункамі.